جھنگ سے حبیب اللہ احسن بھائی کا کتاب پر شفیق تبصرہ !! میرا اس شفقت سے متفق ہونا ضروری نہیں :)
۔۔۔۔۔۔۔۔۔۔۔۔۔۔۔۔۔۔۔۔۔۔
جناب عالی مقام، محترم عبادالرحمٰن (عابیؔ مکھنوی) کراچی
اے ادب کے استاد، جانکار استاد اورحقیقی استاد
اے برستی بارش سے ادھر، کھڑکی سے لگ کے کسی دلچسپ ناول پڑھے جانے کے سمے جیسا عزیز لکھنے والے.
ایسی ہی رواں، آزمودہ جہاں اور بے اماں نثر لکھنے والے انساں۔۔!!
آپ کو بس اک شکریہ کہنا ہے.
اپنی کتاب "زخم تازہ رکھتا ہوں" ھدیہ بھیجنے کا شکریہ اور ایسی سوغات سے دل و دماغ پر ساتواں در کھولنے کا شکریہ.
میں نے پڑھا، میں نے جانا، میں نے مانا اور میں نے اب اسے اپنے لئے کم جانا ہے اور منتظر ہوں جناب کی نثر کی کتابی شکل کا. دل آپ کے لکھے سے ہل گیا ہے.
یہ آپ کی کمال بے رغبتی ہی ہیکہ آپ نوٹوں سے بے نیاز ہیں ورنہ آپ اس سنہری کتاب پر تجارت کریں تو کر سکتے ہیں.
دنیا تو اس دوڑ میں منزل سے آگے جا چکی ہے،
ایک لطیفہ سناتا ہوں، کچھ روز قبل ایک مشہور طبیب نے اپنے پیج پر سر کے بال لمبا کرنے کیلئے ایک معجون متعارف کروائی تو تقدیر کے مارے ہوئے میرے ایک دوست نے تیرہ سو روپے بھیج دئے چار دن کے بعد معجون ملی پارسل کھولا تو اندر سے 120 روپے والی لعوق سپستان کی ڈبیا برآمد ہوئی 😯
بہر کیف اچھی شاعری کا معاملہ کچھ یوں ہے کہ یہ کامل کیفیت کی اسیر ہوا کرتی ہے.
شاعری کی کائنات میں، کیفیت سے باہر صرف خلاء ہے نظم گو کا تخیل، احساس حتّیٰ کہ نظریہء جمال بھی کیفیت کے قانونِ کشش ثقل کا پابند ہو کر اِسی زمین اور اسکی زمینی سچائی سے جُڑ جاتا ہے.
کوئی بھی جذبہ یا احساس، نہاں سے عیاں ہونے کے مرحلے میں گریز سے جس قدر بھی قریب ہو، کیفیت کی ادائے حُسنِ طلب سے رام ہو ہی جاتا ہے سو جب محبوبیت کا اندازِ نظر میسر آئے تو رنج، حزن، ملال، حسرت و واماندگی جیسی پژ مردہ دوشیزاؤں میں بھی ادائے دلنوازی پیدا ہو جاتی ہے.
عابی بھائی آپ نے نظم سے اسی طرز پر معاملہ کیا اور ان تمام جذبات کو حسّاسیت کے جلو میں لیکر اثر آفرینی کی اوجِ کمال تک پہنچایا ہے.
اصل میں جمال دوستی انسان کو بہت حد تک جانبدار بنا دیتی ہے، یوں کہ پھر رنگ، روپ، آواز، منظر، ہر شئے میں خوبصورتی حاوی نظر آتی ہے۔ یہی معاملہ حرف و سخن، شعر اور نظم کے ساتھ ہے۔ جمال دوست، سطروں میں گردش کرتے مضمون کی حدت محسوس کرنے سے پہلے ہی آرائشِ خیال کے طلسمی حُسن میں کھو جاتا ہے،
دل لبھاتی تراکیب کا حُسن ،،،،،
سطروں کی ساخت اور ترتیب کا حُسن،،،،،
اور یوں اصل کہانی کا نشان، زیبِ داستاں کے بہکاوے میں آئے مسافر کی پہنچ سے دور ہوجاتا ہے مگر عابی بھائی آپ کی نظمیں رنگ ،روپ ،چلن اور سبھاؤ میں تو جمال پرستوں کی دلفریب چاہت جیسی ہی ہیں لیکن جہاں جہاں پردہء دل پہ انکے حُسن کے خمار کا رنگ نہیں چڑھتا،
وہ کورے دھبے خود کو سوالوں سے بھرتے دکھائی دیتے ہیں، سوال جو کہیں تاسف، کہیں تحیر اور کہیں خالی پن سے نکلے ہیں۔ "تاسف" جو خوابوں کو تماشا کہنے پہ اُمڈتا ہے۔ "تحیر" جو اس تماشے کو رایگاں سمجھنے والوں کو دُھتکارتا ہے "خالی پن "جو اس رایگانی کے خلاء میں بے وزن تیر رہا ہے.
اور یہ سوال ، جمال دوستوں کو بہکنے کے بعد سنبھالا دینے کو بہت ہیں۔
عابی بھائی آپ کی کتاب میں حسّاسیت اور کیفیت کی مرقع ان نظموں کا بہاؤ پانی کے ریلے جیسا نہیں بلکہ پگھلے ہوئے موم کی طرح قطرہ قطرہ سرکتے ہوئے اپنا نقش چھوڑتا جاتا ہے.
انکا آغاز سُلگتے شعلے کے ساتھ لو دیتا ہے اور پھر جیسے پگھلا ہوا موم، تہ در تہ بہتے ہوئے، موم بتی سے لپٹ کر الگ ہوتے ہوئے بھی پھر سے اسی کے وجود کا حصہ ہو جاتا ہے، یہ نظمیں بھی قاری کو آخری سطر تک پہنچتے پہنچتے اسی صورت گرفت میں لے لیتی ہیں.
"زخم تازہ رکھتا ہوں " کی نظموں کے عنوانات بھی بہت اہمیت کے حامل ہیں. ایک چیز اور جو قابلِ ذکر ہے وہ یہ کہ مضامین اور قدرتِ بیان کے بیچ کا ربط جو کہیں پر بظاہر سوالیہ ہے مگر اصلا" جواب کے پٙرتو میں ڈھلا ہے. شاعر کا باطنی تجربہ، کائناتی سطح پر بکھرے بے شمار گنجلک سوالوں کے جواب کی صورت، کھوجنے والوں کی تگ و دو کا ثمر بن کر سطروں میں سمیٹ دیا گیا ہے. سمندروں کی تہہ میں غوطہ زنی کر کر کے ہیرے، لال اور جواہر قارئین کی جھولیوں میں ڈال دئے گئے ہیں، تخیلات میں گم گونگوں کو الفاظ بخشے گئے ہیں. بس کوڈ کو ڈی کوڈ کرتے جائیے اور منزل بہ منزل رواں دواں ہوتے جائیے.
بہر کیف "زخم تازہ رکھتا ہوں " کا مطالعہ اس احساس سے دوچار کرتا ہے کہ "محض سطر آرائی" سے گریز کرتا یہ نظمانیہ، تہ دار ضرور ہے مگر تٙسامُح سے یکسر محفوظ ہے اور یہ کہ اس کتاب کی نظافت نظم کی دنیا کو سدا مہکاتی رہے گی.
ویسے تو کثیر تعداد میں ایسی کتب موصول ہوتی ہیں جنکے چند صفحات پڑھ کر بوجھ ہوکر الماری میں رکھ دی جاتی ہیں،
لیکن "زخم تازہ رکھتا ہوں" کے پہنچنے کے دن سے ہی ہر روز زخم تازہ کئے کرتا ہوں.
عابی بھائی آپ مجھ سے بڑے ہیں علم سے، عمل سے اور عمر کے کرم سے،
اور میں اک شخص گستاخ کہ جو نئے عہد میں زندگی بسر کر رہا ہوں کہ جس میں مہنگائی کا طوفان ہے اور کشمیر جل رہا ہے اور انسان کی تکریم سکھانے کو انسان ڈھونڈھنا پڑتا ہے.
اگر کچھ آپ کی شان کے خلاف لکھا ہو تو درگزر فرمائیگا.
محمد حبیب ﷲ احسن "18ہزاری، جھنگ"
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جناب عابیؔ مکھنوی صاحب کی شاعری کی چند جھلکیں .....
#حمدباری
بنا کر اپنی ٹھوڑی کو سجا کر اشک آنکھوں میں !!
ذرا سا غم بتاتا ہوں وہ سارا چھین لیتا ہے
کبھی رہنے نہیں دیتا سوالی غیر کے آگے !!
مجھے چلنا سکھانے کو سہارا چھین لیتا ہے
مجھے حاجت نہیں کوئی کہ پُوچھوں زائچہ اپنا !!
جو دُشمن ہو فلک سے وہ ستارا چھین لیتا ہے
فرشتے بھیج دیتا ہے اُسے بہلانے دُنیا میں !!
کسی بچے سے کوئی جب غبارا چھین لیتا ہے
میں اپنے رب کی رحمت کا کروں کیا تذکرہ عابی !!
منافع مجھ کو دیتا ہے خسارہ چھین لیتا ہے
۔۔۔۔۔۔۔۔۔۔۔۔۔۔۔۔۔۔۔۔۔
#نعت_رسول_ﷺ
اِسمِ احمد ﷺ کو چوم کر عابی
مرتے مرتے میں جینے لگتا ہوں
ایسے لگتا ہے جیسے دُنیا میں
حوضِ کوثر سے پینے لگتا ہوں
۔۔۔۔۔
کروڑوں مِٹ گئے لیکن جِدھر دیکھو اُدھر احمد ﷺ
زوال اِسمِ محمدؐ ﷺ پر خدا آنے نہیں دیتا
کوئی رستہ نہیں مِلتا کسی گُستاخ کو عابی !!
محمدؐ ﷺ معاف کر بھی دیں خدا جانے نہیں دیتا
۔۔۔۔۔۔۔۔۔۔۔۔۔
بیٹھے بیٹھے حشر میں اِک دِن جا پہنچا میں
سارا جُھوٹ اُٹھائے سر پر !!
مکر و دَغا کی ساری چالیں کاندھوں پر !!
پوٹلی میں چند کھوکھلے سجدے !!
ماہ صیام کی بُھوک میں ڈُوبے کھوٹے روزے !!
آنکھوں میں عکس ہائے بُتاں کا پُورا البم ڈول رہا تھا !!
بایاں فرشتہ میرا کھاتہ کھول رہا تھا !!
ٹانگیں تھر تھر کانپ رہی تھیں !!
اَبو امی بہن اور بھائی بیٹا بیٹی بیوی سب میں بُھول چُکا تھا!!
جیسا سُنا تھا !جیسا پڑھا تھا ! حشر ذرا کُچھ اُس سے سِوا تھا !!
سوچ میں گُم تھا اب کیا ہو گا !!
دایاں فرشتہ آلتی پالتی مار کے فارغ بیٹھا تھا
بائیں ہاتھ پہ حدِ نِگاہ تک دفتر تھا کرتُوتوں کا !!
سوچ میں گُم تھا اَب کیا ہوگا ! کیسے ہو گا ! کیونکر ہو گا ! کون کرے گا !
لمحہ بھر کو ٹھٹکا ! کسی نے نام لیا ہو میرا جیسے !!
شہد سی میٹھی کوئی صدا تھی !!
کانوں میں رَس گھول رہی تھی !!
مُڑ کر دیکھنے والا تھا کہ واپس دُنیا لوٹ آیا
اور اَب بیٹھا سوچ رہا ہوں !!
تھوڑا بوجھ تو ہلکا کر لُوں
شرم و حیا کا دامن تھاموں !!
مُہلت ہے !! اِس دِل کو تھوڑا نہلا دُوں
مُہلت ہے !! چند سِکے ہی اب چمکا لُوں
شہد سے میٹھی کوئی صدا جب اِن کانوں پر دَستک دے تو
کم از کم یہ آنکھیں تو اِس قابل ہوں کہ دیکھ سکوں اُس ہستی کو
جس کی دُعا میں شامل تھا میں !! جس کی دُعا میں شامل ہوں میں !!
جس نے رب سے جب بھی مانگا !! میرا آج اور کل ہی مانگا !!
مُہلت ہے !! اِس دِل کو تھوڑا نہلا دُوں
مُہلت ہے !! چند سِکے ہی اب چمکا لُوں
۔۔۔۔۔۔۔۔۔۔۔۔۔۔۔۔۔۔۔۔۔۔
#شان امیرالمؤمنین سیدنا صدیقِ اکبر رضی اللہ عنہ !!
وہ جاں ہتھیلی پہ دھر کے آیا وہ مال قربان کر کے آیا
نہ اُس نے کوئی سوال پُوچھا نہ اُس نے کوئی دلیل مانگی !!
وہ ٹاٹ پہنے تو سب فرشتوں کو حکم مِلتا ہے ٹاٹ پہنو !!
عمر (رض) کی حسرت کہ اُس کو پہنچے مگر وہ پہلے ﷺکا دوسرا تھا
خُدا نے جس کو کہا ہو صاحب تو اُس کا رُتبہ شمار کیا ہو !!
حبیب رب ﷺ کا جو یار ٹھہرے تو اُس کی قسمت سے کیا تقابل !!
زمیں نے دیکھا فلک نے دیکھا کہ کِس ادا سے نثار تھا وہ !!
وفا کی وادی سے لاکھوں گُزرے مگر نہیں کوئی اُس کا ثانی !!
میں کتنے برسوں سے لِکھ رہا ہوں مگر قلم کی یہ عاجزی ہے
وہ سر کو تھامے پڑا ہے عابی یہ ہاتھ جوڑے کھڑا ہُنر ہے !!
تو کیوں نہ کہہ دوں کہ دو جہاں میں ہے ایک ہی جو ابوبکر (رض) ہے !!
۔۔۔۔۔۔۔۔۔۔۔۔۔۔۔۔۔۔۔۔۔۔
#شان امیرالمؤمنین "" سیدنا عمر فاروق اعظم رضی اللہ عنہ "" !!
میں آنکھیں جو ذرا کھولوں
کلیجہ منہ کو آتا ہے
سڑک پر سرد راتوں میں !!
پڑے ہیں برف سے بچے !!
دسمبر لوٹ آیا ہے
عمر (رض) اب بھی نہیں آیا
کسی کی بے رِدا بیٹی !!
لہو میں ڈوب کر بولی
کوئی پہرہ نہیں دیتا !!
مِری تاریک گلیوں میں
میں سب کچھ ہار بیٹھی ہوں
درندوں کی حکومت میں !!
عمر (رض) اب بھی نہیں آیا
ذرا آگے کوئی ماں تھی
مُخاطب یُوں خُدا سے وہ !!
مِرے آنگن میں برسوں سے
فقط فاقہ ہی پلتا ہے
کوئی آہیں نہیں سُنتا !!
مِرے بے تاب بچوں کی
میں دروازے پہ دَستک کو !!
زمانوں سے ترستی ہوں
عمر (رض) اب کیوں نہیں آتا
عمر (رض) اب کیوں نہیں آتا
میں آنکھیں جو ذرا کھولوں
کلیجہ منہ کو آتا ہے !!
۔۔۔۔۔۔۔۔۔۔۔۔۔۔۔۔۔۔۔۔۔۔۔
#شان امیرالمؤمنین سیدنا عثمان غنی رضی اللہ عنہ !!
تھر کو درپیش مسئلے سارے !!
مِلتے جُلتے ہیں کُچھ مدینہ سے
لب ترستے ہیں میٹھی بُوندوں کو !!
خلق پِھرتی ہے پانی کے پیچھے !!
میٹھے پانی کا ایک کنواں ہو
نام جس کا ہو بئر رومہ !!
بنیے قابض ہیں سارے غلے پر
بھوک کھاتی ہے تھر میں بچوں کو !!
دُور تک دیکھ کر میں آیا ہوں
قافلہ اُونٹوں کا نہیں کوئی !!
گھنٹیاں جس کی سُن کے زندہ ہو
بر لبِ گور یہ بدن تھر کا !!
تھرکا چہرہ اُداس چہرہ ہے !!
تھر کو مُسکان کی ضرورت ہے
تھر کو عثمان(رض) کی ضرورت ہے
۔۔۔۔۔۔۔۔۔۔۔۔۔۔۔۔۔۔۔۔۔
#شان امیرالمؤمنین سیدنا علی المرتضٰی رضی اللہ عنہ !!
نبی ﷺ کی گود جس کا مدرسہ ہے
وہ میری شاعری سے ماورا ہے
وہ سیدھا حوضِ کوثر پر گیا ہے
علی(رض)کے راستے پہ جو چلا ہے
علی(رض) کا میزباں رب بن گیا تھا
علی(رض) کو آج بھی سب مِل رہا ہے
علی(رض) ہے شیر اپنے رب کا ایسا !!
کہ جس کے دَم سے دیں پُھولا پھلا ہے
قلندر اُٹھ رہے ہیں خاکِ پا سے !!
علی (رض)کا مرتبہ کیا مرتبہ ہے
علی(رض) کے تذکرے میں زندگی ہے
علی (رض)سانسوں میں میری بس گیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
#مختلف_عنوانات
لب و رُخسار کے مارے !! مگر کِردار سے عاری !!
حیا پر قہقہے ہر سُو !! بَدن ہر دام پر بیچا
جنابت انتہا ہے جس محبت کی اُسے عابی !!
قلم کے شہسواروں نے سُخن کے نام پر بیچا
تھوڑا مومن زرا منافق ھوں
میں بھی ماحول کے مطابق ھوں
۔۔۔۔۔۔۔۔۔۔۔۔۔۔۔۔۔۔۔۔۔۔۔
چند کمزور چراغوں سے عقیدت ھے مجھے!!
مجھ سے چڑھتے ھوۓ سورج نہیں پوجے جاتے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صُبحیں بے نُور ہیں سو دِن بھی بُرا لگتا ہے
کالی دَلدَل کو سویرا نہیں لِکھا جاتا
جو کمینہ ہے ، کمینہ ہی لِکھوں گا اُس کو
اور ڈاکو کو مسیحا نہیں لِکھا جاتا
۔۔۔۔۔۔۔۔۔۔۔۔۔۔۔۔۔۔
اُس کو بھی ناز بے نیازی پر
اور فریاد میں نہیں کرتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس نے وعدہ کیا تھا آۓ گا
ھم عقیدہ بنا کے بیٹھ گۓ
۔۔۔۔۔۔۔۔۔۔۔۔۔۔۔۔۔۔۔۔۔۔۔
اس نے بھی دفن کر دیا ماضی
میں بھی پھر حال میں نہیں آیا
۔۔۔۔۔۔۔۔۔۔۔۔۔۔
شاہ چلتے ہیں جب بھی چال نئی
کوکھ ماؤں کی کیوں اجڑتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
روز تم کاٹ کے پھینک آتے ھو جن بچوں کو
مائیں جنتی ھیں انھیں اگتے نہیں کھیتوں میں
۔۔۔۔۔۔۔۔۔۔۔۔۔۔۔۔۔۔۔۔۔۔
سانپ انڈے پی رہے ہیں فاختاؤں کے گھونسلوں سے !!
احتجاجاً جل رہی ہیں لاٹھیاں زیتون کی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مارنا ہے تو شہد لا کے چٹا !
زہر مٹکوں میں پی چکا ہوں میں
۔۔۔۔۔۔۔۔۔۔۔۔۔۔۔۔۔۔
روز سہتی ہیں جو کو ٹھوں پہ ہوس کے نشتر
ہم درندے جو نہ ہوتے تو وہ مائیں ہوتیں
۔۔۔۔۔۔۔۔۔۔۔۔۔۔۔۔۔۔۔۔۔
کھلونا یا خُدا دے دے کسی طوفان کی صورت
مرا دل اب نہیں لگتا کسی بے جان ساحل پر !!
۔۔۔۔۔۔۔۔۔۔۔۔۔۔۔۔۔۔۔۔۔
مِرے اِس عہد کے رِشتے بہت سفاک ہیں عابی
تماشا دیکھ لیتے ہیں عیادت کے بہانے سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہاں وہ خط تھے اب تو کچرا ہو گیا
ہاں یہ دِل تھا اب جو ملبہ ہو گیا
چل منافع لُوٹ کے ہو جا ہوا
جا کیا میں نے یہ سودا ہو گیا
دیکھنے آیا ہے پھر سے چارہ گر
اچھا جی پھر تو میں اچھا ہو گیا
تُو تو تُو تھا تُو ہمیشہ تُو رہا
میں بھی میں تھا پھر میں تیرا ہو گیا
آئینہ ہوں دیکھ لے یا توڑ دے
اُف جُنوں میں کیا تقاضا ہو گیا
اُس کو دعویٰ ہے وہ پُورا آج کل
جس کے جانے پر میں آدھا ہو گیا
شہرتوں کی چاہ والے مٹ گئے
جو چھپا یاں اُس کا چرچا ہو گیا
میں رہا بے دام عابی اور وہ
بِکتے بِکتے اور مہنگا ہو گیا
تیری خاطر بَس ہوا ہے اس قدر
کیا تھا عابی دیکھ اب کیا ہو گی
۔۔۔۔۔۔۔۔۔۔۔۔۔۔۔۔۔۔۔۔۔
ﮐﭽﮯ ﮔﮭﺮ ﺍﻭﺭ ﭘﮑﮯ ﺭِﺷﺘﮯ ﮨﻮﺗﮯ ﺗﮭﮯ
ﮔﺎﺅﮞ ﻭﺍﻟﮯ ﮐِﺘﻨﮯ ﻣِﯿﭩﮭﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﮨﺮ ﺩﺭﻭﺍﺯﮮ ﻣﯿﮟ ﺍَﺏ ﺗﺎﻻ ﮨﮯ
ﭘﮩﻠﮯ ﺗﻮ ﮨﺮ ﺻﺤﻦ ﺳﮯ ﺭﺳﺘﮯ ﮨﻮﺗﮯ ﺗﮭﮯ
ﮐﻮﻥ ﺍَﺫﺍﻧﯿﮟ ﺩﯾﺘﺎ ﮨﮯ ﺍﺏ ﻣﺴﺠﺪ ﻣﯿﮟ !!
ﭘﮩﻠﮯ ﺗﻮ ﮐُﭽﮫ ﺑُﻮﮌﮬﮯ ﺑﺎﺑﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺍﺏ ﺗﻮ ﮐﯿﺒﻞ ﺷﯿﺒﻞ ﺁ ﮔﺌﯽ ﮨﮯ
ﭘﮩﻠﮯ ﺗﻮ ﭘﯽ ﭨﯽ ﻭﯼ ﻭﺍﻟﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺍﺏ ﺗﻮ ﮐﺎﺭ ﻣﯿﮟ ﺩُﻟﮩﻦ ﺟﺎﺗﯽ ﮨﮯ
ﭘﮩﻠﮯ ﺗﻮ ﮈﻭﻟﯽ ﺍﻭﺭ ﺳِﮑﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺍﺏ ﺗﻮ ﺁﺩﮬﺎ ﮔﺎﺅﮞ ﺑﺎﮨﺮ ﮨﮯ
ﭘﮩﻠﮯ ﺗﻮ ﮐﮭﯿﺘﻮﮞ ﻣﯿﮟ ﭘﯿﺴﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺍﺏ ﺗﻮ ﺧُﺸﮏ ﭘﮍﯼ ﮨﮯ ﻧﺪﯾﺎ ﺑﮭﯽ
ﯾﺎﺩ ﮨﮯ ؟؟ ﺑﺎﺩﻝ ﮐِﺘﻨﮯ ﮔﮩﺮﮮ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺑﭽﮯ ﮔﮭﺮ ﻣﯿﮟ ﺳﮩﻤﮯ ﺭﮨﺘﮯ ﮨﯿﮟ
ﭘﮩﻠﮯ ﺗﻮ ﮔﻠﯿﻮﮞ ﻣﯿﮟ ﻣﯿﻠﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺳﺐ ﮐﮯ ﭘﺎﺱ ﮨﯿﮟ ﭨﭻ ﻣﻮﺑﺎﺋﻞ ﺍﺏ
ﭘﮩﻠﮯ ﺗﻮ ﮨﺮ ﺟﯿﺐ ﻣﯿﮟ ﮐﻨﭽﮯ ﮨﻮﺗﮯ ﺗﮭﮯ
ﯾﺎﺩ ﮨﮯ ؟؟ ﮐﺮﮐﭧ ﻣﯿﮟ ﺟﺐ ﺟﮭﮕﮍﮮ ﮨﻮﺗﮯ ﺗﮭﮯ
ﯾﺎﺩ ﮨﮯ ؟؟ ﮨﻢ ﺳﺐ ﺑﺎﻟﮑﻞ ﺑﭽﮯ ﮨﻮﺗﮯ ﺗﮭﮯ
ﮐﯿﺎ ﺍﺏ ﺑﮭﯽ ﮐﻮﺋﯽ ﮐﮭﯿﻠﺘﺎ ﮨﮯ ﺍُﺱ ﺑﺮﮔﺪ ﭘﺮ ؟؟
ﺟﺲ ﺳﮯ ﮨﻢ ﺩِﻥ ﺑﮭﺮ ﮨﯽ ﭼﭙﮑﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺑُﻮﮌﮬﯽ ﺟﺎﻧﻮ ﻣﺎﺳﯽ ﻣﺮ ﮔﺌﯽ ﮨﮯ
ﺟﺲ ﮐﮯ ﮔﮭﺮ ﻣﯿﮟ ﻣﯿﭩﮭﮯ ﭘﺮﺍﭨﮭﮯ ﮨﻮﺗﮯ ﺗﮭﮯ
ﺳُﻨﺎ ﮨﮯ ﺍﺏ ﺗﻮ ﺑﭽﮯ ﺑُﻮﮌﮬﻮﮞ ﺟﯿﺴﮯ ﮨﯿﮟ
ﭘﮩﻠﮯ ﺑُﻮﮌﮬﮯ ﺑﭽﻮﮞ ﺟﯿﺴﮯ ﮨﻮﺗﮯ ﺗﮭﮯ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دَم نِکلتا ہے پھڑاپھڑہٹ سے !!
کوئی پینچھی ہے قید سینے میں
مرنے والوں کو داد کیا دینی !!
سارے رُتبے ہیں یار جینے میں
فرق ہوتا ہے مان لے عابی !!
زہر کھانے میں اور پینے میں
۔۔۔۔۔۔۔۔۔۔۔۔۔۔۔۔۔۔۔۔
جو میری آنکھوں نے دیکھا لوگو !! اگر بتادوں تو کیا کرو گے
جو سُن رہے ہو وہ کچھ نہیں ہے!! میں سب سُنا دوں تو کیا کرو گے
یہ ہڈی بوٹی پہ پلنے والے !! تمھیں بھی جاں سے عزیز تر ہیں
میں اِن کے گورے نَسب کا شجرہ کہیں مِلا دوں تو کیا کرو گے
یَتیم دھرتی کے قاتلوں سے !! کوئی نہیں جو قصاص مانگے
میں اَپنے بَچوں کو دَرس دے کر ابھی لگا دوں تو کیا کرو گے
اے گونگو !! بہرو !! جیو گے کب تک زمیں کے سینے پہ بوجھ بن کے
میں سَارے ناگوں کے سب ٹھکانے تمھیں بتا دوں تو کیا کرو گے
یہ لکھنا پڑھنا یہ کہنا سُننا چلے گا کب تک خِرد کے مارو !!
میں اَپنی کاغذ قلم کی دُنیا ابھی جلا دوں تو کیا کرو گے
اگر طلب ہے تمھیں کہ دیکھو !! وہ پہلے قطرے کا سُولی چڑھنا !!
میں کوئے جاناں سے سُوئے مقتل !! قدم اُٹھا دوں تو کیا کرو گے
تمھاری آنکھوں میں دَم نہیں ہے !! کہ سہہ سکیں وہ کوئی سویرا
میں شَب کے سینے پہ مونگ دَل کے دِیا جلادوں تو کیا کرو گے
یہ سچ کا ہیضہ جسے ہوا ہے !! وہ تُم میں باقی کہاں رہا ہے
جو سو رہا ہے منافق عابی !! اُسے جگادوں تو کیا کرو گے
۔۔۔۔۔۔۔۔۔۔۔۔۔۔۔۔۔۔۔۔
محبت مِثلِ نزلہ ہے !!
ذرا موسم بدلتے ہی کسی سے ہو بھی سکتی ہے
دوا اچھی جو مِل جائے تو پہلی کھو بھی سکتی ہے
ذرا سا درد سر میں اور تھوڑی سُرخی آنکھوں میں !!
یہ دو ہفتوں میں بھرنے اور چلنے والا قصہ ہے
محبت وہ بھی سچی موسموں کے ساتھ چلتی ہے
یہ موسم آتے جاتے ہیں مگر عابی قسم لے لو !!
اعتبار ایک بار آتا ہے !!
اعتبار ایک بار جاتا ہے !!
۔۔۔۔۔۔۔۔۔۔۔۔۔۔۔۔۔۔۔۔۔۔۔
سِتاروں کا چلن بَدلا نہ ہم نے آسماں بدلا
نہ اُس نے باریابی دی نہ ہم نے آستاں بدلا
ہیں دونوں ہی بہت ضِدی خُدا جانے ہو کیا آخر
نہ طُوفاں نے ہی رُخ بدلا نہ ہم نے آشیاں بدلا
اِسی اِک بات پر موجیں ہیں نالاں کِس قدر دیکھو
وہی ہے آج تک کشتی نہ کوئی بادباں بدلا
وہی گَردِ سفر عابی وہی صر صر کے تھپڑ ہیں
نہ صحرا ہی نے رُت بدلی نہ ہم نے کارواں بدلا
۔۔۔۔۔۔۔۔۔۔۔۔۔۔۔۔۔۔۔
ساری دیواروں کو میں دَر لِکھتا
آپ سے پُوچھ کر اگر لِکھتا !!
اُجڑی بستی کو کہکشاں کہتا !!
ساری قبروں کو اپنا گھر لِکھتا
آپ سے پُوچھ کر اگر لِکھتا !!
نفرتیں چُومتا میں آنکھوں سے !!
سارے بارُود کو ثمر لِکھتا
آپ سے پُوچھ کر اگر لِکھتا
لکھتا تتلی کو پھر میں زہریلی !!
اور بچھو کو بے ضرر لکھتا
آپ سے پُوچھ کر اگر لِکھتا !!
رہزنوں کو دعائیں دیتا میں !!
ہر کمینے کو راہبر لِکھتا
آپ سے پُوچھ کر اگر لِکھتا
ہر حقیقت پہ تُھوکتا میں بھی !!
اور "" جیو "" کو معتبر لِکھتا
آپ سے پُوچھ کر اگر لِکھتا
جیسے کہتے ہیں آپ !! لِکھتا تو
پِھر تو میں بھی !! اَگر مَگر !! لِکھتا
آپ سے پُوچھ کر اگر لِکھتا
۔۔۔۔۔۔۔۔۔۔۔۔۔۔۔۔۔۔۔۔۔۔۔
ابھی سے سُود و زیاں ہے کیسا ابھی تو ادنٰی سی اِبتدا ہے
ابھی سے رَستے بَدل رہے ہو ابھی تو ذِکرِ وفا ہوا ہے
ابھی نہ ہارو !! ابھی نہ بِکھرو !! ابھی ہے روشن چراغ دِل کا
ابھی رگوں میں لہو ہے باقی ابھی تو گُلشن ہرا بھرا ہے
ابھی یہ تمغے سنبھال رکھو ابھی تو باقی ہیں کٹنے والے
ابھی تو بازی جمے گی عابی ابھی تو مقتل کا دَر کُھلا ہے
دنیا !! تیرے دِلاسوں کے ڈر سے
غم !! ہنسی میں اُڑا کے جیتے ہیں
پانی کم ہے بدن میں پہلے ہی !!
اِس لیے !! مسکرا کے جیتے ہیں
روشنی !! کیسے ہو نہ آنگن میں
خواب !! سُوکھے جَلا کے جیتے ہیں
کون کہتا ہے !! ہم مُنافق ہیں
بس ذرا !! بچ بچا کے جیتے ہیں
روز وہ پُوچھتے ہیں کیسے ہو !!
روز اُن کو بتا کے جیتے ہیں
اپنی باتیں ہیں !! اپنا لہجہ ہے
اپنے ہاتھوں کا !! کھا کے جیتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ﮐﺴﯽ ﺳﮯ ﺩﻭﺭ ﺟﺎﻧﮯ ﮐﻮ ﺫﺭﺍ ﺳﯽ ﺩﯾﺮ ﻟﮕﺘﯽ ﮨﮯ
ﮐﺴﯽ ﮐﻮ ﭘﺎﺱ ﻻﻧﮯ ﻣﯿﻦ ﺯﻣﺎﻧﮯ ﺑﯿﺖ ﺟﺎﺗﮯ ﮨﯿﮟ
ﺟﻮ ﻻﻭﺍ ﺭﺍﮐﮫ ﮐﺮﺗﺎ ﮨﮯ ﺍﭼﺎﻧﮏ ﺗﻮ ﻧﮩﯿﮟ ﭘﮭﭩﺘﺎ
ﮐﮧ ﺣﺪ ﺳﮯ ﭘﺎﺭ ﺟﺎﻧﮯ ﻣﯿﮟ ﺯﻣﺎﻧﮯ ﺑﯿﺖ ﺟﺎﺗﮯ ﮨﯿﮟ
ﮐُﮭﻼ ﮨﮯ ﺁﺳﻤﺎﮞ ﻋﺎﺑﯽ ﻣﮕﺮ ﯾﮧ ﭘﺮ ﻧﮩﯿﮟ ﮐُﮭﻠﺘﮯ
ﮐﮧ ﻋﺎﺩﺕ ﯾﺎﺩ ﺁﻧﮯ ﻣﯿﮟ ﺯﻣﺎﻧﮯ ﺑﯿﺖ ﺟﺎﺗﮯ ﮨﯿﮟ
بہت آسان ہوتا ہے اگر کیکر اُگانے ہوں
مگر کانٹے اُٹھانے میں زمانے بیت جاتے ہیں
نئے کے شوق میں عابی پُرانے کو تو مت پھونکو
دیا کوئی جلانے میں زمانے بیت جاتے ہیں
۔۔۔۔۔۔۔۔۔۔۔۔۔۔۔۔۔۔۔۔
"شاعری نہیں کرنی"
جب تلک سلامت ہوں شاعری نہیں کرنی
ناخنوں کے نیزوں سے زخم تازہ رکھنے ہیں
شاعری نہیں کرنی
رہبروں کی منڈی میں کوڑیوں کے بھاؤپر
کون کتنا بِکتا ہے بس حساب رکھنا ہے
شاعری نہیں کرنی
خواب تو اُترتے ہیں ڈٹ کے سونے والوں پر
جاگنے کا ٹھیکہ ہے جاگتے ہی رہنا ہے
شاعری نہیں کرنی
شاعری بھی آتی ہے قافیے بھی کافی ہیں
ننھی مُنی بحروں میں وصل کے ترانوں کو
ہجر کے عذابوں کو درد کے غلافوں میں
پیش کر کے دُنیا سے داد دونوں ہاتھوں سے
میں سمیٹ سکتا ہوں
بھیگتے دسمبر میں بے مثال پریوں کی
کروٹوں کے نقشوں کو نرم گرم لفظوں کی
آنچ پر پکانا تو شاعروں کا پیشہ ہے
میرا اپنا دھندہ ہے
شاعری نہیں ہوتی
میں لہو پسینے کو خاک پر بہاتا ہوں
پھر میں دونوں ہاتھوں سے گوندھتا ہوں مٹی کو
ہڈیوں کے گُودے میں جب تھکن اُترتی ہے
چار پیڑے آٹے کے میں گھسیٹ لاتا ہوں
شاعری نہیں کرتا
شاعری کے مندر میں پُوجا پاٹ چلتی ہے
سب کو شاد رکھنے کے گُر مجھے نہیں آتے
میں نے تو یہ دیکھا ہے چاند کی محبت میں
جو چکور جاتا ہے آسماں کے نرغے میں
آسماں پٹختا ہے بے وقوف پنچھی کو
چاند کتنی صدیوں سے آج بھی اکیلا ہے
میرا نام عابی ہے میں زمیں کا باسی ہوں
اور زمیں پہ رہتا ہوں
ناخنوں کے نیزوں سے
زخم تازہ رکھتا ہوں
شاعری نہیں کرتا
شاعری نہیں کرتا
۔۔۔۔۔۔۔۔۔۔۔۔
آپ سردار ہیں ، زردار ہیں یا خان کوئی
مُجھ پہ احسان کوئی ہے تو ذرا بتلائیے !
میں نمک کھا کے مُکرتا نہیں خِدمت سے
میں تو تھک ہار کے مزدوری سے ! کُچھ لِکھتا ہوں
آپ کا پیشہ سیاست کے علاوہ کیا ہے ؟
آپ کی پیاس بُجھاتا ہے پسینہ میرا
آپ کے پیٹ میں روٹی ہے مِرے کھیتوں کی
آپ کے بچوں کے گالوں پہ جو یہ سُرخی ہے !
میرے بچوں کے کئی فاقے لگے ہیں اِس میں !!
۔۔۔۔۔۔۔۔۔۔۔۔۔۔۔۔
محمد حبیب ﷲ احسن "18ہزاری، جھنگ"
0 Comments